Hjólasöfnun Barnaheilla – Save the Children á Íslandi hófst formlega í gær. Matthildur Eggertsdóttir, 4ra ára leikskólastúlka, var fyrst til að gefa hjól, en hún kom með gamla hjólið sitt í Sorpu á Sævarhöfða.
Þetta er í þriðja sinn sem Barnaheill standa fyrir söfnun á notuðum reiðhjólum fyrir börn og unglinga. Í tilkynningu kemur fram að söfnunin stendur til 15. júní og verður hjólum safnað á endurvinnslustöðvum Hringrásar og Sorpu á höfuðborgarsvæðinu.
Hjólin eru ætluð börnum sem ekki hafa kost á því að kaupa sér reiðhjól. Hægt er að sækja um hjól hjá Félagsþjónustunni í Reykjavík, Kópavogi, Hafnarfirði og í Reykjanesbæ.
Lið sjálfboðaliða gerir hjólin upp undir styrkri stjórn sérfræðinga í reiðhjólaviðgerðum. Söfnunin er að þessu sinni unnin í samstarfi við Æskuna barnahreyfingu IOGT og Íslenska fjallahjólaklúbbinn.
Hægt er að fylgjast með hjólasöfnuninni á Facebook-síðu hennar þar sem fólk getur einnig skráð sig til þátttöku í viðgerðum.