Íslenskt endurnýjanlegt eldsneyti var 23% af heildarmagni endurnýjanlegs eldsneytis sem notað var til samgangna árið 2014 og á síðustu fjórum árum hefur hlutfall endurnýjanlegs eldsneytis til samgangna tífaldast. Þetta er á meðal þess sem kemur fram í nýrri skýrslu um þróun orkuskipta í samgöngum sem Ragnheiður Elín Árnadóttir, iðnaðar- og viðskiptaráðherra kynnti á ríkisstjórnarfundi. Skýrslan er unnin af atvinnuvega- og nýsköpunarráðuneytinu, Orkustofnun og Grænu orkunni.
Frá árinu 2011 hefur markvisst verið unnið að því að hækka hlutfall endurnýjanlegs eldsneytis í samgöngum í samræmi við þingsályktun Alþingis og aðgerðaáætlun henni tengdri. Stjórnvöld hafa beitt sér með ýmsum hætti, í samvinnu við verkefnisstjórn um orkuskipti í samgöngum (Grænu orkuna), og má þar helst nefna skattalegar ívilnanir fyrir rafmagns- eða tvinnbifreiðar og söluskyldu fyrir endurnýjanlegt eldsneyti.
Meðal þess sem hefur áunnist má nefna að hlutfall endurnýjanlegs eldsneytis í samgöngum á landi hefur tífaldast síðan 2010, úr 0,2% í 2,4%. Þetta er mun meiri aukning en spáð hafði verið í eldsneytisspá orkuspárnefndar. Magn innlends eldsneytis til samgangna hefur einnig fimmaldast síðan 2010. Árið 2014 var innlent eldsneyti 23% af öllu endurnýjanlegu eldsneyti sem selt var til samgangna. Nokkur fjöldi nýrra fyrirtækja hefur tekið til starfa sem framleiða innlent endurnýjanlegt eldsneyti. Fjöldi vistvænna bifreiða hefur þrefaldast síðan árið 2010. Aðgengi að endurnýjanlegu eldsneyti hefur einnig batnað með tilkomu nýrra innviða. Sölustöðum metans hefur fjölgað og svo hafa verið reistar hraðhleðslustöðvar á höfuðborgarsvæðinu. Verulegur árangur hefur náðst í aukinni fræðslu bæði þeirra sem starfa í bílgreininni og koma að öryggismálum og fyrir almenning.
Stefnt er að því að skýrslan verði lögð fyrir Alþingi nú á vorþingi til kynningar og umfjöllunar. Í kjölfarið verði svo unnin ný aðgerðaráætlun um orkuskipti í samgöngum sem verði vegvísir um næstu skref og hún lögð fyrir Alþingi á komandi haustþingi sem tillaga til þingsályktunar.
