Fjallað var um vefmál og hlutverk þeirra í rekstri fyrirtækja á fundi Skýrslutæknifélags Íslands í gær. Þar var því velt upp hvort vefstjórar í fyrirtækjum væru í raun forstjórarnir þar sem stefnur vefstjóra ríma ekki endilega við stefnur fyrirtækisins. Fjölmennt var á fundinum sem haldinn var á Grand Hótel. Skýrslutæknifélag Íslands er óháð félag einstaklinga, fyrirtækja og stofnana á sviði upplýsingatækni.
Fyrirlesarar á fundinum voru þau Sigurjón Ólafsson frá Fúnksjón vefráðgjöf, Díana Dögg Víglundsdóttir, vefstjóri hjá N1, Magnús Þór Gylfason, yfirmaður samskiptasviðs Landsvirkjunar, og Hjalti Sigfússon, vefstjóri Reykjavík Excursions.