Næst stærsta fatakeðja heims, Hennes & Mauritz, hyggst loka um 250 verslunum á næsta ári en alls rekur félagið um 5.500 búðir. Forstjóri H&M, Helena Helmersson, segir að félagið muni standa betur að vígi eftir að heimsfaraldurinn er yfirstaðinn en fyrir hann. Félagið hyggst auka áherslu sína á netverslun.

Segir Helmersson að í framtíðinni geti hluti af núverandi búðum H&M verið notaðar meðal annars sem dreifileið fyrir netsölu keðjunnar. Umfjöllun á vef Financial Times.

Félagið birti árshlutauppgjör fyrir þriðja ársfjórðung í dag. Þar kemur fram að sala H&M dróst saman um sextán prósent milli ára á þriðja ársfjórðungi, sem er frá og með júní til september, en um fimm prósent í september. Hagnaður félagsins eftir skatta nam um 28 milljörðum króna á fjórðungnum. Það sem af er ári hefur félagið tapað tæplega tuttugu milljörðum króna.

Þegar faraldurinn stóð sem hæst voru fjórar af hverjum fimm búðum H&M lokaðar. Í upphafi þriðja ársfjórðungs voru um 900 búðir lokaðar sökum áhrifa af kórónufaraldrinum en um 166 búðir eru lokaðar í dag. Hlutabréf félagsins hafa hækkað um ríflega sex prósentustig í viðskiptum dagsins en markaðsvirði þess er 303 milljarðar Bandaríkjadala.

Um fjórðung af alls 5.000 verslunum keðjunnar munu endursemja leigusamninginn sinn og ætlar félagið að nýta tækifærið og loka 250 búðum.