Kaupás og Ávaxtabíllinn gerðu nýlega samning um sölu á hollustuvörum Ávaxtabílsins í verslunum Nóatúns og 11-11. Er þessi samningur í anda stefnu Kaupáss að auka framboð af hollum kosti í verslunum sínum og geta nú viðskiptavinir Nóatúns og 11-11gengið að hollum skyndibitum vísum, segir í fréttatilkynningu.

Meðal þess sem boðið er upp á eru glös með ávaxtasalati eða melónubitum auk grænmetissnakks í glasi með ídýfu. Einnig má finna þéttar og girnilegar heilhveitilanglokur með túnfiski og rækjum og vitaskuld án majóness, segir í fréttatilkynningunni.

Hvítu hveitibrauðsdögunum er lokið og mæjónesálögunum hefur verið létt af íslenskum samlokum. Fjórar tegundir af samlokum eru á boðstólum og líkt og með langlokurnar, er um sérvalið úrvals brauð að ræða. Þrjár tegundir pastarétta - með rækjum, ostablöndu og kjúklingi - eru fáanlegar og byggja þær allar á heilhveitipasta úr lífrænt ræktuðu hráefni en ennfremur eru á boðstólum þrjár tegundir af grænmetissalati - einnig með rækjum, ostablöndu og kjúklingi.

Allir pasta- og salatréttir eru toppaðir með ljúffengum ristuðum fræjum, hnetum og Dukkah og eru bragðlaukarnir því kitlaðir með hverjum bita. Síðast en ekki síst ber að nefna tilbúna ávaxtaskyrdrykki sem gerðir eru úr hreinu skyri og ávöxtum. Engin aukaefni eru í drykkjunum og eru þeir því einstök blanda prótíns, kolvetna. Allir réttir Ávaxtabílsins byggja á ferskleika og eru án aukaefna og óæskilegra viðbóta, segir í fréttatilkynningunni.