Fella þarf niður allar ferðir hjá ferðaskrifstofunni Gray Line ef hópferðabílstjórar fara í fyrirhugað verkfall 28. og 29. maí. Þetta kemur fram á mbl.is. Meðal ferða Gray Line eru ferðir til flugstöðvar Leifs Eiríkssonar, á Gullna hringinn, Bláa lónið, Snæfellsnes og víðar.
VR, Flóbandalagið og LÍV eru nú í kjaradeilu við Samtök atvinnulífsins eins og víða hefur komið fram og er verkfall hópferðabílstjóra hluti af aðgerðum VR.
„Það er alveg ljóst að þetta verkfall mun hafa mikil áhrif um allt land og á þjónustu okkar við okkar gesti. Nú þegar er svolítið um það að hópar hafa verið að afbóka ferð sína til Íslands og það sem verra er þá er líka tregða hjá hópum sem ætla að koma síðar á árinu til landsins að staðfesta bókanir,“ segir Þórir Garðarsson, sölu- og markaðsstjóri Gray Line í samtali við mbl.is.