*

þriðjudagur, 18. janúar 2022
Erlent 30. nóvember 2021 13:12

Hörð barátta um Telecom Italia

Fyrirhuguð yfirtaka KKR á Telecom Italia yrði ein stærsta framtaksfjárfesting evrópskrar viðskipasögu en Novator á milljarða undir.

Ritstjórn
Mario Draghi, forsætisráðherra Ítalíu.
european pressphoto agency

Luigi Gubitosi, forstjóri Telecom Italia hætti störfum fyrir helgi í kjölfar deilna við Vivendi, stærsta hluthafa Telecom Italia, á stjórnarfundi síðastliðið föstudagskvöld. Novator, fjárfestingafélag Björgólfs Thors Björgólfssonar, á tæplega 3% hlut í félaginu sem metinn er á tæplega 50 milljarða íslenskra króna miðað við yfirtökutilboðið sem er á genginu 0,505 evrurmá hlut.

Vivendi, sem á 24% hlut í Telecom Italia, hafði áður gefið í skyn að Gubitosi bæri ábyrgð á slæmu gengi fjarskiptafélagsins að undanförnu. Vivendi taldi einnig að yfirtökutilboð KKR í Telecom Italia, sem Viðskiptablaðið greindi frá á dögunum hafi verið gert með hjálp Gubitosi án vitundar hluthafa. Auk þess hafi Vivendi fundist tilboðið vera of lágt. Þetta kemur fram í grein Financial Times. Uppsögn forstjórans átti sér stað viku eftir yfirtökutilboðið.

Frá því að Gubitosi tók við félaginu árið 2018, og þar til hann sagði upp, hafði gengi hlutabréfa í Telecom Italia fallið um 40%.

Samkvæmt umfjöllun erlendra miðla fjárfesti Novator fyrst í Telecom Italia árið 2017 og stutti þá vogunarsjóðinn Elliott í breytingum á skipulagi félagisns. Hlutur Novator í Telecom Italia hækkaði í tæplega 3% í mars árið 2020. Ekki liggur fyrir hvað Novator hefur greitt fyrir hlutinn. Gengi bréfa Telecom Italia stóð í ríflega 0,7 evrum á hlut í ársbyrjun 2018 ig fær hæst í 0,88 evrur á hlut það ár en féll lægst niður í 0,34 evrur í mars 2020.

Yfirtakan velti á ýmsu

Ýmsar hindranir standa í vegi fyrir yfirtöku KKR á Telecom Italia. Óvissa ríkir um það hvort ítölsk stjórnvöld, sem eiga 10% hlut í fjarskiptafélaginu, samþykki yfirtökutilboðið. Mario Draghi, forsætisráðherra Ítalíu, hefur ekki skipt sér mikið af fyrirhugaðri sölu en skiptar skoðanir eru um söluna í ríkisstjórn Draghi, samkvæmt umfjöllun Financial Times.

Telecom Italia er jafnframt stórt félag og yfirtöku stórs félags fylgir viss áhætta, en yfirtakan verður ein stærsta framtaksfjárfesting evrópskrar viðskiptasögu ef hún fær samþykki stjórnvalda og hluthafa. Áhættan í tilboðinu felst ekki síður í því hvað gengi félagsins hefur verið langt undir væntingum á undanförnum árum.

Tilboð KKR hefur vakið athygli annarra fjárfestingarfélaga á fjarskiptafélaginu og virðist samkeppni vera að myndast um yfirtöku. Fjölmörg félög hafa auk þess reynt að yfirtaka fjarskiptafélagið á undanförnum tveim áratugum, Vivendi þar á meðal.

Stikkorð: Novator Telecom Italia