Sessor hefur ráðið til sín Hrannar Erlingsson og Rögnu Bergmann í lykilstjórnendastöður félagsins, það er sem fjármálastjóra og sem sviðsstjóra ráðgjafar- og þjónustusviðs..
Hrannar Erlingsson tekur við sem fjármálastjóri og stýrir fjármála- og bókhaldsþjónustu félagsins. Sviðið aðstoðar viðskiptavini við að fullnýta tæknilegar lausnir, auka sjálfvirkni, veita lykilupplýsingar til stjórnenda í rauntíma og leitar hagræðinga í stoðþjónustum.
Hrannar hefur reynslu úr upplýsingatæknigeiranum en hann starfaði áður sem framkvæmdastjóri Wise til ársins 2019. Wise er sagt vera leiðandi á Íslandi í ráðgjöf, þjónustu og sölu á Business Central (Navision) í tilkynningu um ráðninguna.
Hrannar hefur auk þess gegnt ýmsum stjórnunar- og ráðgjafastörfum í tæknigeiranum til dæmis hjá Streng og býr yfir 25 ára reynslu, en hann er viðskiptafræðingur frá HÍ.
Ragna Bergmann tekur við sem sviðsstjóri ráðgjafar- og þjónustusviðs Sessor. Sviðið leggur áherslu á að veita viðskiptavinum upplýsingatækniráðgjöf, framkvæma úttektir á stöðu upplýsingatæknimála og leiðir þá í gegnum stafrænar umbreytingar.
Ragna starfaði áður sem sérfræðingur í upplýsingatækni og viðskiptaferlum hjá Rubix. Rubix er sagt í tilkynningu vera leiðandi fyrirtæki í Evrópu í sölu á varahlutum og iðnaðarvörum til viðgerða og rekstrar, með starfsemi í 23 löndum og yfir 8.000 starfsmenn.
Ragna vann að heildarinnleiðingu á Navision, uppbyggingu á vefverslun ásamt samþættingum við viðskiptavini og móðurfélag. Ragna er með tvær B.Sc. gráður í eðlisfræði og vélaverkfræði frá Háskóla Íslands.
Áhersla á a aukna sjálfvirkni
Sessor er óháð ráðgjafar-og þjónustufyrirtæki í upplýsingatækni og stoðþjónustum, sem leggur áherslu á að auka sjálfvirkni, bæta rekstraröryggi og lækka heildarrekstrarkostnað.
Í samstarfi við öfluga birgja útvegar félagið heilstæðar lausnir og þjónustur í stoðþjónustum. Meðal lausna sem félagið útvegar eru Business Central (Navision), Microsoft 365, rekstrarlausnir, viðskiptalausnir, sérlausnir, sjálfvirknivæðing og viðskiptagreind.“