Hrannar Pétursson félagsfræðingur hefur ákveðið að gefa kost á sér í embætti forseta Íslands. Þetta tilkynnti hann á blaðamannafundi á heimili sínu í Garðastræti í dag.
Hannar starfaði lengi sem fréttamaður hjá RÚV og hefur auk þess starfað sem upplýsingafulltrúi hjá Isal og framkvæmdastjóri samskiptasviðs hjá Vodafone. Nú síðast starfaði hann tímabundið sem verkefnisstjóri í forsætisráðuneytinu, eða allt þar til í október síðastliðnum.
Úr tilkynningu frá Hrannari:
Hrannar er 42 ára gamall félagsfræðingur með fjölbreytta reynslu úr atvinnulífinu. Hann var framkvæmdastjóri mannauðs-, markaðs- og lögfræðimála hjá fjarskiptafyrirtækinu Vodafone og talsmaður fyrirtækisins um árabil. Hann starfaði áður sem upplýsingafulltrúi hjá Íslenska álfélaginu og fréttamaður í útvarpi og sjónvarpi.
Hann hefur undanfarið starfað sjálfstætt og veitt fyrirtækjum og stofnunum ráðgjöf á sviði upplýsinga- og samskiptamála, þ.m.t. Stjórnarráði Íslands. Hrannar er fæddur og uppalinn á Húsavík, annar í röð fjögurra sona Sólveigar Jónsdóttur skólaliða og Péturs Skarphéðinssonar verkamanns.
Hann er kvæntur Margréti Arnardóttur, vélaverkfræðingi og viðskiptafræðingi. Hún starfar sem verkefnastjóri vindorku hjá Landsvirkjun. Þau eiga samtals fjögur börn á aldrinum 5 til 18 ára - tvær stúlkur og tvo drengi - og búa í Reykjavík.