Ammar Alkhudairy, stjórnarformaður Saudi National Bank (SNB), stærsta viðskiptabanka Sádi-Arabíu, hefur sagt af sér vegna persónulegra ástæðna. Financial Times greinir frá.
Alkhudairy sagði upp skömmu eftir að hann sagði í viðtali við Bloomberg um miðjan mánuðinn að SNB, sem keypti 10% hlut í Credit Suisse í fyrra, hygðist ekki veita svissneska bankanum frekari fjárhagsaðstoð. Alkhudairy sagði að ef SNB myndi eignast yfir 10% hlut í Credit Suisse myndi það hafa í för með sér auknar kröfur af hálfu eftirlitsaðila.
Þrátt fyrir að ummælin endurspegluðu viðurkennda stefnu innan SNB þá tók hlutabréfaverð Credit Suisse dýfu eftir viðtalið. Svissneski bankinn var keyptur af UBS nokkrum dögum síðar með tilstuðlan neyðarlaga svissneskra stjórnvalda.
Viðmælendur FT sem starfa í Mið-Austurlöndum segja að ummæli Alkhudairy hafi að óþörfu beint athygli að SNB. „Það var ekki góð hugmynd að fara í sjónvarpsviðtal í miðri bankakrísu,“ er haft eftir einum.
Yfirtaka UBS á Credit Suisse leiddi til tæplega eins milljarðs dala taps hjá SNB. Heimildarmaður FT segir að að samsvari þó undir 2% af eignasafni bankans, sem er með 30% markaðshlutdeild í sádi-arabíska bankageiranum.