Fjöldi fólks er látinn og fjöldi særður eftir hryðjuverkaárás í Brussel í morgun. Ein sprenging var á alþjóðaflugvellinum í Brussel og önnur á neðanjarðarlestarstöð nálægt stofnunum Evrópusambandsins.
Búið er að loka öllum neðanjarðarlestarstöðvum í Brussel vegna hryðjuverkaógnar auk þess sem búið er að lýsa yfir hæsta viðbúnaðarstigi.
Árásin kemur fjórum dögum eftir að Salah Abdeslam var handtekinn, en hann hefur verið ákærður fyrir aðild að hryðjuverkaárásinni í París í nóvember sem kostaði 130 manns lífið. Lögreglan í Belgíu hefur verið með mikinn viðbúnað síðan hann var handtekin, en hún segir að hún hafi búist við hefndaraðgerðum í kjölfar handtökunnar.
Talið er að heildarfjöldi látinna í Brussel sé kominn í 23 auk þess að tugir til viðbótar hafa særst.
