*

sunnudagur, 15. september 2019
Innlent 18. maí 2017 15:01

Hugbúnaðarþróun Rafarnarins í nýtt félag

Spectralis er nýtt félag um hugbúnaðarþróun Rafarnarins, og er Hildur Ólafsdóttir nú framkvæmdastjóri þess, en Raförninn fékk Sigurð Hauk Bjarnason sem nýjan framkvæmdastjóra.

Ritstjórn
Haraldur Guðjónsson

Nýtt félag hefur verið stofnað utan um hugbúnaðarþróun Rafarnarins. Félagið nefnist Spectralis og hefur flutt inn í höfuðstöðvar móðurfélagsins, Verkís.

Raförninn mun áfram leggja áherslu á ráðgjöf, viðhald og mælingar á myndgreiningarbúnaði en með breytingunum nást fram skýrari áherslur á ólík svið og hagkvæmari rekstur sem skilar sér til viðskiptavinarins í styttri boðleiðum og mögulega hagstæðara verði og hefur Raförninn ehf. í 30 ár verið í fararbroddi í ráðgjöf, mælingum, viðhaldi og hugbúnaðargerð fyrir myndgreiningardeildir á heilbrigðissviði, segir í fréttatilkynningu frá félaginu.

Hugbúnaðarteymið á bak við Spectralis hefur um árabil þróað veflægar hugbúnaðarlausnir fyrir heilbrigðisgeirann þar sem áhersla er lögð á gagnasöfnun og -birtingu, gagnaöryggi og sjálfvirka gagnagreiningu til hámörkunar á rekstraröryggi. Markmiðið með nýju félagi er m.a. að kynna aukna hagkvæmni við notkun slíkra lausna í verkfræðigeiranum til að auka yfirsýn, skilvirkni og öryggi í rekstri hjá viðskiptavinum Verkís.

Við breytingarnar fær Raförninn nýjan framkvæmdastjóra, Sigurð Hauk Bjarnason rafvirkjameistara, sem starfað hefur hjá fyrirtækinu um nokkurt skeið en fráfarandi framkvæmdastjóri Rafarnarins, Hildur Ólafsdóttir, er nýr framkvæmdastjóri Spectralis.