Að raunvirði nemur lækkunin á húsnæðisverði á höfuðborgarsvæðinu um 17% frá upphafi árs en húsnæðisverðshækkanir undanfarinna ára hafi ásamt vaxandi kaupmætti og fleiri þáttum verið grundvöllur aukinnar neyslu.
Þetta kemur fram í Morgunkorni Glitnis í morgun en Greining Glitnis segir að þessi þróun komi ekki á óvart í ljósi þess að húsnæðisverð lækkar almennt allnokkuð í banka- og gjaldeyriskreppum.
„Viðbúið er að húsnæðisverð lækki meira og jafnvel mikið meira,“ segir í Morgunkorni.
Greining Glitnis segir þorra íslenskra heimila verða illa undir í þessari þróun en um 80% íslenskra heimila eiga það húsnæði sem þau búa í.
„Afar stór hluti af sparnaði landsmanna er bundinn í húsnæði sem eigið fé á móti skuldum,“ segir í Morgunkorni.
„Eiginfjárhlutfallið er afar mismunandi en verst fer sparifé þeirra sem eru með lágt eiginfjárhlutfall í eign sem lækkar hvað mest í verði. Erfiðleikarnir eru mestir meðal þeirra sem þurfa nú að borga háar afborganir samhliða því að standa frami fyrir tekjusamdrætti vegna kreppunnar.“
Þá segir Greining Glitnis að húsnæðisverðshækkanir undanfarinna ára hafi ásamt vaxandi kaupmætti og fleiri þáttum verið grundvöllur aukinnar neyslu. Ávinningurinn eða eiginfjáraukningin hafi verið veðsett að hluta og nýttur í neyslu.
„Eignaverðsáhrif hækkandi húsnæðisverðs hafa þannig knúið vöxtinn í hagkerfinu,“ segir í Morgunkorni.
„Þessi áhrif eru tiltölulega sterk hér á landi vegna þess hve húsnæðiseign er almenn. Nú gerist hið gagnstæða. Húsnæðisverðslækkanir og væntingar um slíkt hefta aðgang að fjármagni. Flestum heimilum finnst þau einnig fátækari þegar eign þeirra hefur rýrnað í verði. Dregur þetta úr neyslu um þessar mundir.“
