Netnotkun Íslendinga eykst um tæp tvö prósent á milli áranna 2013 og 2014 og teljast nú 97% íbúa landsins til reglulegra netnotenda. Þetta kemur fram í nýrri frétt frá Hagstofu Íslands .
Þetta er hæsta hlutfall sem mælist í Evrópu en meðaltal reglulegra netnotenda í löndum Evrópusambandsins er 75%.
Mikil aukning hefur orðið í notkun einstaklinga á farsímum og snjallsímum til að tengjast netinu utan heimilis og vinnu, og á það nú við um 59% netnotenda. Verslun einstaklinga á netinu jókst einnig mikið á milli ára, en 67% netnotenda höfðu nú verslað á netinu ári fram að rannsókn.
Aukning netverslunar er mest við lönd utan Evrópusambandsins og Bandaríkjanna. Netverslun hefur aukist á kvikmyndum og tónlist sem og tölvum og jaðartækjum en hins vegar dróst netverslun verulega saman á milli ára á bókum, tímaritum og fjarskiptaþjónustu.
Árið 2014 höfðu 8% netnotenda greitt fyrir tölvuskýsþjónustu til að geyma rafrænt efni eða deila því með öðrum, en árið 2013 höfðu tæp 4% svarenda greitt fyrir geymslurými á netinu. Þá hafa 24% netnotenda notað tölvuforrit sem keyrð eru í gegnum netið, fyrir ritvinnslu, töflureikni eða glærukynningar.
Þriðjungur íslenskra fyrirtækja selja vörur og þjónustu í gegnum netið eða önnur vefkerfi og er það hæsta hlutfall sem mælist á Evrópska efnahagssvæðinu. Þá keyptu 43% fyrirtækja á Íslandi einhverskonar tölvuskýsþjónustu af netinu en ónæg þekking á tölvuskýjum kemur í veg fyrir að 29% fyrirtækja nýti sér þá þjónustu.
