*

miðvikudagur, 26. janúar 2022
Innlent 7. mars 2016 15:45

Hvernig fór Ísland að þessu?

Fyrrverandi forseti Real Madrid stendur fyrir ráðstefnu um íslenska knattspyrnu og efnahagslífið.

Ritstjórn
european pressphoto agency

Ramón Calderón, fyrrverandi forseti spænska knattspyrnuliðsins Real Madrid, mun ásamt íslenskum samstarfsaðilum standa fyrir ráðstefnu í Hörpu í maí um árangur Íslands undir yfirskriftinni „Hvernig fór Ísland að þessu?“ Í tilkynningu segir að markmið ráðstefnunnar sé að velta því upp hvaða lærdóma megi draga af því hvernig Íslandi hefur tekist að snúa vörn í sókn í bæði íþróttum og efnahagsmálum.

Calderón kynnti ráðstefnuna á fundi í höfuðstöðvum Íslandsbanka á Kirkjusandi í dag, en Íslandsbanki er samstarfsaðili ráðstefnunnar.

Í tilkynningunni er haft eftir Calderón að það sé með ólíkindum að hafa fylgst með Íslendingum frá því að bankarnir hrundu árið 2008 og hvernig þjóðin hafi náð að standa saman í því að snúa við að því sem virðist vonlausri stöðu yfir í að vera aftur komin í fremstu röð í lífsgæðum þjóða. Það sama gildi um íþróttaiðkun Íslendinga. Spyr hann hvernig svona lítil þjóð hafi náð þeim árangri að komast á lokamót Evrópukeppni í handbolta, körfubolta og svo nú í knattspyrnu, bæði hjá körlum og konum.