*

sunnudagur, 26. september 2021
Innlent 30. júní 2021 08:12

Hvernig virkar skatt­af­sláttur hluta­bréfa?

Verkefnastjóri hjá KPMG ræðir áhrif skattafrádráttar vegna hlutabréfakaupa í sprotum og aukinn áhuga á First North markaðnum.

Ritstjórn
Ásgeir Skorri Thoroddsen, verkefnastjóri hjá KPMG.
Aðsend mynd

Í tengslum við yfirstandandi hlutafjárútboð Solid Clouds hefur KPMG tekið saman upplýsingar sem eiga að gagnast þeim sem eru að velta fyrir sér hver áhrifin af skattfrádrættinum eru á sig. „Það er algengt að viðskiptavinir okkar, hvort sem það eru nýsköpunarfélög í fjármögnunarfasa eða fjárfestar sem eru að velta fyrir sér fjárfestingum í slíkum félögum, séu að velta fyrir sér áhrifum skattfrádráttarins á sig." segir Ásgeir Skorri Thoroddsen, verkefnastjóri hjá KPMG.

„Fólki hefur þótt lagareglan flókin. Okkar markmið með þessari framsetningu er reyna að sýna fólki með einföldum hætti hver raunveruleg áhrif lagareglunnar eru. Þannig eiga einstaklingar að geta farið inn á GRID síðuna og sett inn sínar forsendur, breytt þeim og séð hver er væntur skattfrádráttur," bætir hann við og vísar þar til upplýsinga sem hann hefur tekið saman og birt á heimasíðu GRID.

 „Það er afar jákvætt að sjá íslensk nýsköpunar- og vaxtarfyrirtæki nýta sér First North markaðinn til að fjármagna sig og sem vettvang til vaxtar. Við hjá KPMG finnum fyrir auknum áhuga á meðal okkar viðskiptavina á skráningum, m.a. á First North markaðinn. Áhugi á skráningum hefur að vísu verið lengi til staðar, meðal annars vegna þess hversu vel hefur tekist til að byggja upp virkan First North markaði annars staðar og er þá oft vísað til Svíþjóðar í þeim efnum. First North er vaxtarmarkaður, hugsaður fyrir fyrirtæki í vexti. En það má kannski segja að við höfum oft skynjað ákveðna hræðslu á meðal forsvarsmanna vaxtarfyrirtækja að taka skrefið í átt að skráningum. Þrátt fyrir jákvæðar vaxtarsögur af fyrirtækjum á borð við Kviku og Icelandic Seafood sem fyrst fóru á First North og þaðan yfir á aðallistann."

En í kjölfarið af vel heppnuðum útboðum Íslandsbanka og Play finni hann á samtölum við viðskiptavini og aðra að óttinn við skráningu fari minnkandi. „Það eru fleiri vaxtarfyrirtæki reiðubúin að hefja undirbúning, eða a.m.k. skoða alvarlega þann möguleika frekar. Þannig finnum við það í okkar verkefnum, þegar verið er að greina valkosti í fjármögnun, einkum vaxtarfyrirtækja, að skráning á First North markaðinn sé valkostur sem fyrirtæki í auknum mæli líta til. Það er afar jákvætt og vonandi tekst okkur vel til í þeim efnum," segir hann.

Ásgeir Skorri telur að fjármögnunarumhverfi nýsköpunar- og vaxtarfyrirtækja sé jákvætt um þessar mundir. „Vísisjóðir hér á landi hafa verið að ljúka fjármögnun, en á skömmum tíma hefur verið tilkynnt um nokkra nýja vísisjóði hér á landi. Þá hefur verið talsvert af því að erlendir vísisjóðir séu að fjárfesta í íslenskum nýsköpunar- og vaxtarfyrirtækjum. Og á sama tíma er mikið líf á hlutabréfamarkaði, nýjar skráningar og fleiri á dagskrá. Þannig að við erum með vel fjármagnaða vísisjóði og vonandi vel heppnaðar skráningar á First North og hlutafjárútboð. Það er jákvætt þegar það eru nokkrir valkostur sem fyrirtæki geta verið að horfa til og máta sig og sína sýn við."