Úrvalsvísitalan (OMXI6) lækkaði um 4,9% í dag og stóð við lok markaða í 841 stigi samkvæmt Markaðsvaktinni.
Vísitalan lækkaði um 1,1% í gær og lækkaði nokkuð ört við opnun í morgun og hreyfðist lítið seinni part dags.
Gamla Úrvalsvísitalan (OMXI15) lækkaði um 3,4% og stendur nú í 284 stigum.
Á markaðssíðu vb.is má sjá helstu breytingar einstakra félaga í Kauphöllinni en aðeins eitt félag, Marel hækkaði í dag.
Straumur leiddi lækkanir dagsins og lækkaði um 19,3% og hefur því lækkað um 25,9% í vikunni. Þá lækkaði Eimskipafélagið um 10% í dag og Century Aluminum um 8,6%.
Velta með hlutabréf var um 350 milljónir króna en þar af voru um 168,5 milljónir með bréf í Össur.
Þá var velta fyrir tæpar 123 milljónir króna með bréf í Straum, tæpar 35 milljónir króna með bréf í Marel en minni velta var með bréf í öðrum félögum.
Velta með skuldabréf nam í dag um 12,3 milljörðum króna.