Elsta byggingafyrirtæki Bretlands, R Durtnell and Sons er farið í þrot eftir yfir 400 ára rekstur. Fyrirtækið var stofnað árið 1591 og hefur verið rekið af sömu fjölskyldu í þrettán kynslóðir að því er BBC greinir frá . Um 100 manns störfuðu hjá fyrirtækinu sem vann að 3,5 milljarða endurbótum á Royal Pavilion höllinni í Brighton.
Fyrirtækið hóf störf í Kent á tímum Elísabetar fyrstu Englandsdrottningar sem ríkti frá 1558 til 1603. Fyrirtækið byggði Poundsbridge sveitasetrið í Kent árið 1593 en setrið stendur enn.
R Durtnell and Sons sérhæfði sig í byggingu kirkna, skóla, listasafna og lúxusvilla. Fyrirtækið var rekið með 108 milljón króna tapi árið 2017. Erfitt efnahagsástand er sagt hafa komið niður á rekstrinum en yfir 7.000 verktakafyrirtæki hafa orðið gjaldþrota á Bretlandi frá árinu 2008.
