Upplýsingatæknifyrirtækið Origo hefur verið valið samstarfsaðili ársins í öryggislausnum hjá IBM í Danmörku. Viðurkenningin náði til allra samstafsaðila IBM í Danmörku og á Íslandi.

Anton Már Egilsson, lausnastjóri hjá hugbúnaðarlausnum Origo, segir að fjölmörg tæknifyrirtæki búi yfir góðri þekkingu á öryggislausnum og því sé ánægjulegt að jafn öflugt fyrirtæki hafi valið að heiðra Origo fyrir góðan árangur.

„Við erum mjög ánægð með viðurkenningu frá fyrirtæki sem er það stærsta sinnar tegundar í öryggislausnum í heiminum og sýnir að við erum svo sannarlega á réttri leið," segir Anton, sem tók við verðlaununum. „Þetta eru önnur viðurkenningin sem hugbúnaðarlausnir Origo hljóta á skömmum tíma en við komust í lokaúrslit Beacon, nýsköpunarkeppni IBM, fyrr á árinu."

Anton segir að Origo hafi lagt mikla áherslu á rekstur öryggislausna á liðnum árum með það að markmiði að hámarka öryggi viðskiptavina okkar svo að þeir geti einbeitt sér að sínum rekstri.

„Þá skiptir ekki síst máli að geta notið liðveislu jafn öflugs fyrirtækis eins og IBM, sem er með hátt í 400 þúsund starfsmenn á heimsvísu. Við búum vel að því að geta sótt í gnótt úrval lausna frá IBM og 24/7 vöktun og greiningu öryggismála í samvinnu við tæknirisann."