Vísitala íbúðaverðs á höfuðborgarsvæðinu var 313,9 stig í ágúst og lækkaði um 0,1% frá fyrra mánuði samkvæmt tölum frá Fasteignaskrá Íslands.
Þannig lækkar vísitalan nú í fyrsta skipti í þrjá mánuði en í júlí júlí hækkaði vísitalan í fyrsta skipti í 12 mánuði, eða frá því í júlí í fyrra. Breytingin milli mánaða nú er þó minnsta breyting, hvort sem um er að ræða hækkun eða lækkun, frá því í júní 2008.
Á myndinni hér til hliðar má sjá þróun vísitölu íbúðaverðs síðastliðin þrjú ár. Þar sést hvernig vísitalan hefur lækkað síðasta árið en í mars og apríl á þessu ári tók vísitalan nokkra dýfu niður á við. Þannig lækkaði vísitalan um 3,8% í mars sl. sem þá var mesta lækkun milli mánaða í yfir 15 ár eða frá því að byrjar var að reikna vísitölu íbúðaverðs.
Í raun hefur íbúðaverð lækkað töluvert frá því í janúar 2008 þegar vísitalan náði hámarki (357,4 stigum) en síðan þá hefur íbúðaverð lækkað um 12%. Þangað til í júlí á þessu ári hafði íbúðaverð þannig aðeins hækkað tvisvar milli mánaða á hálfu öðru ári.
Síðastliðna 3 mánuði hækkaði vísitala íbúðaverðs um 1%, síðastliðna 6 mánuði hefur hún lækkað um 2,7% og lækkun síðastliðna 12 mánuði nemur 10,2%.
Vísitala íbúðaverðs á höfuðborgarsvæðinu sýnir breytingar á vegnu meðaltali fermetraverðs.
Íbúðarhúsnæði er skipt í flokka eftir stærð og hvort það telst fjölbýli eða sérbýli. Reiknað er meðalfermetraverð fyrir 9 flokka íbúðarhúsnæðis. Niðurstaðan er vegin með hlutdeild viðkomandi flokks í heildarverðmæti á markaði miðað við undangengna 24 mánuði.
