*

miðvikudagur, 19. júní 2019
Innlent 25. apríl 2017 10:06

Íbúðaverð hefur hækkað um 19%

Verð á sérbýli hefur hækkað um 18,2% á sama tímabili og fjölbýli um 19,3% á tímabilinu mars 2016 til mars 2017.

Ritstjórn
Haraldur Guðjónsson

Íbúðaverð hefur hækkað um 19% að raungildi á tímabilinu mars 2016 til mars 2017. Verð á sérbýli hefur hækkað um 18,2% á sama tímabili og fjölbýli um 19,3%. Þetta er meðal þess sem kemur fram í nýrri skýrslu Reykjavík Economics um húsnæðismarkaðinn á höfuðborgarsvæðinu sem að fyrirtækið vann fyrir Íslandsbanka. Skýrslan verður kynnt á sérstökum fræðslufundi í dag klukkan 17 í útibúi Íslandsbanka í Laugardal, á Suðurlandsbraut.

Í skýrslunni kemur jafnframt fram að stór hópur fólks sé á leið inn á húsnæðismarkaðinn og einnig fer fyrstu kaupendum fjölgandi á markaðnum. Meðalaldur þessa hóps er 32 ár. Þá skapar fólksfjölgun og aðflutningur fólks til landsins náttúrulega eftirspurn eftir húsnæði.

Hæsta meðalverð á fermetra í miðborginni eða innan Hringbrautar og meðal staðgreiðsluverð í hverfinu árið 2016 var 469 þúsund krónur á fermeter. Hlutfallsleg hækkun í hverfum Reykjavíkur var mest í Hólahverfi eða um 19% og Seljahverfi kemur næst á eftir með 18% hækkun. Ef verð á höfuðborgarsvæðinu er skoðað, utan Reykjavíkur, er Seltjarnarnes með hæsta verðið á fermetra eða 437 þúsund krónur. Þá hækkar Seltjarnarnes einnig hlutfallslega mest á árinu 2016 eða um 24%.

Leiga hækkað um 68,1%

Leiga hefur sömuleiðis hækkað, eða um 10,3% á tímabilinu mars 2016 til mars 2017 og leigusamningum hefur sömuleiðis fækkað á tímabilinu. Leiguverð hefur hækkað um 68,1% frá byrjun árs 2011 til loka september 2016. Á meðan hefur verðlag hækkað um 21,1% á sama tíma.

Þá kemur einnig fram að minnkandi atvinnuleysi og traustari tekjuöflun heimila landsins renni sterkari stoðum undir íbúðamarkaðinn og auðveldara er að áætla framtíðartekjur en áður.

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is