Flugvél frá Iceland Express mun lenda í Boston í fyrsta sinn síðdegis í dag. Þar með er annar áfangastaður félagsins í Bandaríkjunum kominn á áætlun félagsins. Á síðasta ári hóf félagið áætlunarflug til New York.
Í tilkynningu frá Iceland Express kemur fram að flogið verður til Boston alls fjórum sinnum í viku.
Þá kemur fram að Iceland Express mun fjölga áfangastöðum í Norður-Ameríku í næstu viku, þegar félagið hefur áætlunarflug til Chicago.
Vélar Iceland Express fljúga á flugrekstrarskírteini breska flugfélagsins Astraeus en bæði félögin eru í meirihlutaeigu Pálma Haraldssonar.