Pálmi Haraldsson, einn af eigendum Iceland Express og Sterling-flugsamstæðunnar, segir það "sjálfgefið" að Iceland Express verði selt ef samningar nást um að FL Group taki yfir Sterling.
Í samtali við Viðskiptablaðið segir Pálmi að ef verður af yfirtökunni og fái hann greitt með bréfum í FL Group fyrir eignarhlut sinn í Sterling, og að hann ákveði að halda þeim bréfum, neyðist hann til þess að selja Iceland Express. Pálmi segist þó að ef það gerist muni hann sjá mikið eftir Iceland Express þar sem tekist hefur að snúa við rekstrinum.
Samkvæmt heimildum Viðskiptablaðsins er áætlaður hagnaður Iceland Express um 300 milljónir á þessu ári en töluvert tap var á rekstri félagsins í fyrra. Pálmi segir að verðhugmyndir, sem heimildamaður Viðskiptablaðsins viðraði í síðustu viku, séu fráleitar. Heimildamaður Viðskipablaðsins taldi að félagið væri falt fyrir 500 milljónir til viðbótar við skuldir.
Heimildamenn Viðskiptablaðsins telja að kaupverðið liggi á bilinu 4-6 sinnum hagnaður Iceland Express fyrir afskriftir og fjármagnsliði (EBITDA). Pálmi sagði það ekki ólíklegt en benti þó á að miðað við þann viðsnúning sem hefur orðið á félaginu gæti það orðið allt að 8-10 sinnum EBITDA.
Pálmi sagði að viðræðum við FL Group verði haldið áfram í næstu viku um að yfirtaka Sterling-samstæðuna. Mikill taprekstur hefur verið á rekstri Sterling og Mærsk Air, sem nýlega rann inn í Sterling. Taprekstur Mærsk Air á síðasta ári nam 500 milljónum danskra króna (5,14 milljarðar íslenskra króna). Einnig var taprekstur á Sterling á tímabilinu og nam tapið 120 milljónum danskra króna (1,23 milljarðar íslenskra króna). Ekki er útlit fyrir að rekstrarumhverfið skáni á næstunni ef spár um að olíuverð haldist hátt rætast.
Einnig verður samruni Sterling og Mærsk Air dýr og reiknar greiningardeild Landsbankans með að hann kosti félagið um einn milljarð króna. Pálmi sagði að samruninn gæti jafnvel kostað meira en milljarð.