Iceland Express ætlar að hefja áætlunarflug til Mílanó á norðurhluta Ítalíu næsta sumar að því er segir í tilkynningu félagsins. Flogið verður einu sinni í viku, á laugardögum, frá og með júníbyrjun. Mílanó er önnur stærsta borg Ítalíu. Borgarbúar í Mílanó eru tæplega ein og hálf milljón, en á stór-Mílanó svæðinu eru um 7,4 milljónir íbúa.
Mílanó er gjarnan kölluð efnahagsleg höfuðborg landsins, enda hýsir hún kauphöllina. Þá telst hún til helstu háborga heims í tísku og hönnun. Margar gamlar og fallegar byggingar prýða borgina, auk frægra listasafna. Þá er stutt að fara í Alpana til að skoða sig um og njóta einstæðrar náttúrufegurðar.