Icelandair Group hagnaðist um 85,8 milljónir dollara (10,4 milljarða króna) á þriðja ársfjórðungi. Þetta er töluvert meira en á sama tímabili í fyrra þegar félagið hagnaðist um 65,3 milljónir dollara (7,9 milljarða króna).
Heildartekjur félagsins jukust um 13% og EBITDA nam 123,9 milljónum dollara (15,1 milljarði króna). EBITDA á sama tímabili í fyrra nam 102,2 milljónum dollara (12,4 milljörðum krónum).
Samkvæmt uppgjörinu var eigiðfjárhlutfall 46% í lok september. Handbært fé frá rekstri nam 5,8 milljónum dollara (706 milljónum króna) samanborið við 30,3 milljónir dollara (3,7 milljarða króna) árið áður.
„Millilandaflug félagsins gekk vel á þriðja ársfjórðungi og var afkoma þess mjög góð," er haft eftir Björgólfi Jóhannssyni, forstjóra Icelandair Group, í tilkynningu. „Framboð í leiðakerfinu var aukið um 19% frá fyrra ári. Sætanýting var 84,2%, og jókst um 0,7 prósentustig frá fyrra ári. Tæplega 970 þúsund farþegar ferðuðust með félaginu í fjórðungnum og hafa þeir aldrei verið fleiri.
Aukin umsvif í millilandaflugi ásamt mikilli fjölgun ferðamanna til Íslands höfðu jákvæð áhrif á aðra starfsemi samstæðunnar.
Hagnaður félagsins á þriðja ársfjórðungi nam 85,8 milljónum USD og jókst um 20,5 milljónir USD frá fyrra ári. Fjárhagslega er félagið mjög sterkt og tilbúið til þess að takast á við verkefni framtíðarinnar, en þegar hefur verið tilkynnt um áætlanir um 12% vöxt í millilandaflugi á næsta ári.
Vegna góðs gengis á þriðja ársfjórðungi gerum við nú ráð fyrir að EBITDA ársins 2014 muni nema 150-155 milljónum USD sem er hækkun frá áður útgefinni afkomuspá.“
