Gengi hlutabréfa í Icelandair hefur ekki verið hærra í tæpan mánuð. Við lok dags í gær stóð gengið í 1,42 eftir 5,99% hækkun. Bréfin hafa haldið áfram að hækka í morgun og í hádeginu nam hækkunin 6,71% og stóð gengið í 1,51.
Í byrjun febrúar fór gengið í 1,84 sem er það hæsta sem það hefur farið í á árinu. Eftir það fóru bréfin að lækka í verði og fóru lægst í 1,34 á mánudaginn. Síðan þá hafa þau hækkað eins og áður sagði og hefur gengið ekki mælst hærra síðan 24. febrúar.
Ljóst að fréttir gærdagsins um að ákveðið hafi verið að breyta reglugerðum þannig að Bandaríkjamenn og Bretar geti komið til Íslands hafi þeir bólusetningarvottorð hafa haft jákvæð áhrif á gengið Icelandair Group .