*

laugardagur, 7. desember 2019
Innlent 31. maí 2019 17:54

Icelandair segir upp 24 Max flugmönnum

Meðal aðgerða hjá Icelandair vegna kyrrsetningar Boeing 737 MAX véla félagsins er að stöðva þjálfun 21 nýliða.

Ritstjórn
Bogi Nils Bogason, forstjóri Icelandair Group, segir einhverja af þeim flugmönnum sem sagt var upp í dag hafa tækifæri til að fara í önnur störf hjá félaginu.
Haraldur Guðjónsson

Icelandair tilkynnti á fundi með hópi flugmanna í þjálfun í dag að óhjákvæmilegt væri að stöðva þjálfun 21 nýliða sem til stóð að hæfu störf sem flugmenn á Boeing 737 MAX vélar félagsins í sumar, sem og slíta ráðningasamningi við 24 flugmenn sem hófu þjálfun á MAX vélarnar síðasta haust og höfðu hafið störf áður en vélarnar voru kyrrsettar.

Þessi ákvörðun var tekin í ljósi þess að félagið gerir ekki ráð fyrir MAX vélunum í flugáætlun sinni fyrr en um miðjan september nk., eins og fram kom í tilkynningu frá félaginu þann 24. maí sl.

„Það er þungbært að þurfa að grípa til þessarar sársaukafullu aðgerðar en við teljum það nauðsynlegt í ljósi þeirra erfiðu aðstæðna sem komnar eru upp vegna kyrrsetningar Boeing 737 MAX vélanna,“ segir Bogi Nils Bogason, forstjóri Icelandair Group.

„Kyrrsetningin hefur talsverð neikvæð áhrif á rekstur félagsins og við verðum að leita allra leiða til að hagræða og draga úr kostnaði. Við vonumst þó til að geta gefið þessum flugmönnum kost á starfi hjá fyrirtækinu á ný þegar undirbúningur fyrir næsta sumar fer af stað en það kemur betur í ljós þegar málin skýrast varðandi MAX vélarnar.“

Icelandair mun bjóða aðstoð við atvinnuleit í samstarfi við ráðningastofu en einhverjir flugmannanna sem hafa til þess tilskilda þjálfun eiga kost á að fara í önnur störf hjá félaginu, t.d. sem flugliðar, flugumsjónarmenn eða í önnur störf.