Icelandair skorar hæst, þriðja árið í röð, þegar markaðsstjórar á Íslandi eru beðnir um að nefna 2-3 fyrirtæki sem hafa staðið sig vel í markaðsmálum á síðastliðnu ári.
Þetta kom fram á Ímark-deginum á föstudag en um að er ræða könnun sem framkvæmd er af Capacent. Sem fyrr segir eru markaðsstjórar landsins beðnir um að nefna 2-3 fyrirtæki sem staðið hafa sig vel í markaðsmálum á síðastliðnu ári.
Um 38% aðspurðra nefndu Icelandair en þetta er sem fyrr segir þriðja árið í röð sem Icelandair skorar hæst. Þá er Icelandair með rúmlega þrefalt hærra hlutfall en félagið í öðru sæti, Wow air.
Wow air hefur ekki verið með áður þannig að fyrirtækið kemur nýtt inn á listann. Toyota, Vís, VR og Geysir koma jafnframt ný inn á listann en VR er eina félagið sem kemst á topp tíu listann.
Athygli vekur að tvö flugfélög (í víðum skilningi þess orðs) og þrjú símafyrirtæki eru á listanum en aðeins einn banki, eitt tryggingafélag og eitt bílaumboð. Þá er Geysir eina verslunin á listanum.
Röð þeirra tíu fyrirtækja sem nefnd voru er þannig:
- Icelandair 38%
- Wow air 11,7%
- Nova 7,8%
- Vodafone 6,6%
- Síminn 6,3%
- Toyota 6,3%
- Vís 5,4%
- Íslandsbanki 4,8%
- VR 3,9%
- Geysir 3,6%
