Öll rök eru fyrir 75 punkta lækkun stýrivaxta í 3,75%, að mati IFS greiningar. Í spá IFS segir að vaxtaákvörðunin næstkomandi miðvikudag velti þó mikið á áætlun um afnám gjaldeyrishaftanna en til stendur að birta áætlun um afnám þeirra í lok febrúar eða byrjun mars. Seðlabankinn þrengdi vaxtaganginn við síðustu ákvörðun og gerir IFS ráð fyrir því að það verði ekki gert í þetta sinn.

„Gangi spáin eftir og Seðlabankinn breyti vöxtum jafnt verða vexti á viðskiptareikningum lánastofnanna 2,75% og hámarksvextir á 28 daga innstæðubréfum 3,50%“

Spá IFS greiningar:

Gjaldeyrishöft forsenda lækkana

Við gerum ráð fyrir því að afnám gjaldeyrishafta verði framkvæmd í smáum skrefum þegar hættan á óstöðugleika og útflæði gjaldeyris hefur verið lágmörkuð. Verði sú raunin er að okkar mati ekki ástæða til að halda vöxtum háum og gætu þeir verið lækkaðir meira og á svipuðum hraða og verið hefur. Ákveði Seðlabankinn hins vegar að ráðast hratt í afnám hafta teljum við nauðsynlegt að hækka vexti til að styðja við gengið.

Verðbólga hefur hjaðnað hratt

Önnur rök fyrir stýrivaxtalækkun í næstu viku eru hversu hratt verðbólgan hefur hjaðnað. Hún hefur hjaðnað hraðar en flestir bjuggust við og er 12 mánaða verðbólga komin niður í 1,8% í janúar. Fjárfestingar eru í lágmarki og framleiðsluslaki er mikill, atvinnuleysi fer hækkandi og verðbólga er á hraðri niðurleið. Einnig kæmi vaxtalækkun sér vel fyrir skuldsett heimili og fyrirtæki. Raunstýrivextir á Íslandi eru jákvæðir (+2,7%) en hafa verið neikvæðir í BNA (-1,25%) frá seinni hluta 2009 og á evrusvæðinu (-1,2%) frá ársbyrjun 2010. Að mati IFS eru raunstýrivextir á Íslandi enn of háir.

Hefur lækkun gengis áhrif?

Lækkun gengis krónunnar frá síðustu vaxtaákvörðun er ekki líkleg til að hafa áhrif á ákvörðun vaxta nú að okkar mati. Lækkun undanfarna tvo mánuði er hægt að rekja til útflæðis vaxtagreiðslna, gjaldeyriskaupa S.Í. og árstíðarbreytinga í ferðamannaiðnaðinum. Þess vegna teljum við líklegt að lækkun gengis gangi fljótlega til baka.