„Stýrivaxtafundur Seðlabanka Íslands verður haldinn næsta miðvikudag, 16. mars. Við gerum ráð fyrir óbreyttum vöxtum um sinn vegna óvissunnar sem umlykur þjóðaratkvæðagreiðslu um Icesave og áætlun um afnám gjaldeyrishaftanna en til stendur að birta hana 25. mars. Fyrri bráðabirgðaspá okkar hljómaði uppá 25 punkta lækkun stýrivaxta en vegna áðurnefndrar óvissu teljum við að þeir haldist óbreyttir.“ Þetta segir í stýrivaxtaspá IFS greiningar.
Gangi spáin eftir og Seðlabankinn heldur öllum vöxtum óbreyttum verða vextir á viðskiptareikningum lánastofnanna 3,25% og hámarksvextir á 28 daga innstæðubréfum 4,0%, veðlánavextir (7 daga) eru 4,25%, daglánavextir 5,25% og vextir af bindiskyldum innstæðum 3,25%.
Umfjöllun IFS Greiningar:
Verðbólga hefur ekki alltaf áhrif á vaxtaákvarðanir
Yfirleitt hefur verið fylgni á milli verðbólgu og þenslu í vestrænum hagkerfum og stýrivaxtaákvarðanir þess vegna ekki vafist mikið fyrir seðlabönkum. Nú er hins vegar efnahagslegur slaki í flestum vestrænum löndum og óvenju lítið um fjárfestingar á sama tíma og verðbólga fer hækkandi. Verðbólgan nú er augljóslega ekki vegna þenslu og eftirspurnarþrýstings í vestrænum hagkerfum heldur vegna uppskerubrests, upplausnarástands í miðausturlöndum og eftirspurnar í nýmarkaðsríkjum. Samkvæmt orðum yfirhagfræðings Seðlabanka Íslands fylgja stýrivextir ekki verðlagssveiflum nema þær fari að hafa áhrif á verðbólguvæntingar eða leiða til launahækkana.
Hefur lækkun gengis áhrif?
Gengi krónunnar hefur lækkað nokkuð síðan um áramótin eða um 3,8%. Einnig hafa hrávörur hækkað mikið í verði og þá sérstaklega olía. Kjarasamningar nokkurra stórra stétta eru lausir og munu verðlagshækkanir og fréttir af launahækkunum þeirra launahæstu ekki draga úr kröfum þeirra. Þessir þættir geta komið í veg fyrir lægri vexti en ella sem kæmi afar illa við fjárfestingu í landinu sem þegar er í lágmarki.
