Erlendar skuldir Íslendinga eru mjög miklar hvort sem litið er á vergar eða hreinar skuldir og telur IFS Greining að erlendar skuldir Íslendinga nemi um 295% af vergri landsframleiðslu.
Þetta kemur fram í skýrslu IFS Greiningar um erlenda skuldastöðu þjóðarinnar en í kjölfar hruns allra stærstu banka Íslands í október 2008 hafa erlendar skuldir íslenska ríkisins aukist verulega.
„Okkar mat er að hreinar skuldir Íslendinga nemi um 80% af vergri landsframleiðslu í lok árs 2009,“ segir í skýrslu IFS en í við mat á sjálfbærni skuldastöðunnar hefur IFS byggt á þeirri forsendu að Íslendingar þurfi að skapa gjaldeyri til að greiða vexti og afborganir af erlendum lánum.
Þá segir jafnframt að greiðslubyrði af erlendum lánum sé þung og hátt hlutfall af vöru- og þjónustujöfnuði.
„Ef fisk og álverð helst svipað og það er um þessar mundir, munu íslendingar eiga í erfiðleikum með að borga af erlendum lánum,“ segir í skýrslu IFS.
„Ef á hinn bóginn, ál- og fiskverð hækkar umtalsvert á næstu árum, þá geta Íslendingar borgað sínar erlendu skuldir. Þá reddast þetta allt saman. Aukning á fiskveiðikvóta myndi einnig hafa jákvæð áhrif.“