*

þriðjudagur, 17. september 2019
Innlent 12. ágúst 2016 12:10

Illugi gefur ekki kost á sér

Illugi Gunnarsson sækist ekki eftir áframhaldandi setu á þingi.

Ritstjórn
Illugi Gunnarsson ætlar ekki að fara aftur á þing.

Illugi Gunnarsson, menntamálaráðherra og þingmaður Sjálfstæðisflokksins, ætlar ekki að gefa kost á sér til sætis á Alþingi í komandi kosningum. Frá þessu greindi hann á Facebook síðu sinni rétt í þessu.

Illugi hefur starfað sem menntamálaráðherra frá því að ríkisstjórn Sjálfstæðisflokksins og Framsóknarflokksins hóf störf árið 2013. Nú er þó ljóst að hann sækist ekki eftir sæti á lista Sjálfstæðisflokksins í komandi prófkjöri í Reykjavík.

Hér að neðan má sjá yfirlýsingu Illuga í heild sinni.

„Kæru vinir.

Eftir vandlega yfirlegu hef ég ákveðið að ég muni ekki gefa kost á mér til setu á Alþingi í næstu kosningum. Allt frá því ég kom heim frá námi árið 2000 hafa stjórnmál verið megin viðfangsefni mitt og ég hef starfað sem aðstoðarmaður forsætisráðherra og utanríkisráherra, gegnt þingmennsku, verið þingflokksformaður og nú síðast ráðherra. Þessi tími hefur verið sérstakur í þjóðarsögunni, tími mikilla átaka og stórra atburða sem marka munu íslenskt samfélag til framtíðar.

Ég er mjög þakklátur fyrir það tækifæri sem ég hef fengið til að taka virkan þátt í þjóðfélagsumræðunni og sérstaklega vil ég þakka öllum þeim sem hafa stutt mig með ráðum og dáð á undanförnum árum, bæði í prófkjörum sem og í stjórnmálastarfinu almennt.

En mat mitt er að ég standi nú á þeim tímamótum að annað hvort haldi ég áfram í stjórnmálum og geri þau að ævistarfi, fái ég til þess stuðning kjósenda, eða snúi mér að öðrum verkefnum. Í ljósi þessa hef ég komist að þeirri niðurstöðu að um það bil 16 ára vera á sviði stjórnmálanna sé nægjanleg, a.m.k. að sinni og að skynsamlegast og áhugaverðast fyrir mig sé að leita nýrra áskoranna á öðrum vettvangi.

Ég mun kveðja stjórnmálin sáttur, en vissulega með nokkrum söknuði. Um leið hlakka ég til að takast á við ný verkefni, hver sem þau kunna að verða.“