„Ég er yfir mig spennt,“ segir Inga Lind Karlsdóttir, þáttastjórnandi The Biggest Ísland sem hefur göngu sína á SkjáEinum í kvöld.
„Þótt ég sé búin að sjá fyrsta þáttinn tvisvar, vera sjálf þáttastjórnandinn og vita nákvæmlega hvernig hann endar, þá get ég ekki beðið eftir að horfa í kvöld,“ segir Inga Lind.
Í þættinum er keppt í þyngdartapi en þeir eru bandarískir og hófu göngu sína 2004. Í dag hafa þeir verið teknir upp í mörgum löndum og þúsundir einstaklinga um allan heim hafa farið í gegnum heilsuferli The Biggest Loser sem er vottað af læknum, sálfræðingum og næringarfræðingum.
Keppendur verða tólf og koma alls staðar að af landinu. Þeir dvöldu á heilsuhótelinu Ásbrú í tíu vikur þar sem þeir freistuðu þess að breyta lífsstíl sínum og kepptust við að léttast. Þættirnir eru framleiddir af Sagafilm fyrir SkjáEinn.
Fyrsti þátturinn fer í loftið í kvöld klukkan 20.30.
