*

þriðjudagur, 1. desember 2020
Innlent 9. október 2020 14:12

Inn- og útflytjendur andi rólega

FA segir að innflytjendur ættu að forðast að binda fé í aukabirgðum á breskum vörum því ólíklegt að tollamúrar rísi um áramót.

Ritstjórn
Eitt einkenna Lundúna þar sem nýjar fríverslunarviðræður Bretlands og ESB sem hefjast í dag eiga sér stað er Big Ben kirkjuklukkan í turni þinghúsins, en turninn hefur á síðari árum verið kallaður sama nafni og bjallan fræga sem er inn í honum.
epa

Félag atvinnurekenda segir ósennilegt að tollmúrar muni rísa milli Íslands og Bretlands um áramótin þegar bráðabirgðasamningur Bretlands við Evrópusambandið rennur út í kjölfar úrsagnar landsins úr sambandinu, og hvetur félagsmenn sína um að anda rólega.

Þar sem svo gæti farið að þær samningaviðræður sem nú standa yfir milli EFTA og Bretlands hafi ekki verið kláraðar um áramótin þá mun samkvæmt umfjöllun utanríkisráðuneytisins bráðabirgðafríverslunarsamningur sem Ísland og Noregur hafa þegar gert við Bretland geta tryggt kjarnahagsmuni landsins þar til framtíðarviðræðum EFTA við Bretland lýkur.

Þær viðræður eru svo aftur háðar gengi viðræðna Bretlands við ESB um framtíðartilhögun viðskipta ríkisins við sambandið, en ný samningalota í þeim viðræðum hefst í London í dag. FA segir að félagið hafi fengið fyrirspurnir frá félagsmönnum sem stundi inn- og útflutning frá Bretlandi um hvort hætta sé á að almennir tollar taki gildi um áramótin.

Jafnvel séu einhver dæmi séu um að birgjar íslenskra innflutningsfyrirtækja hafi þrýst á um að þau birgi sig upp af vörum til að forðast að tollar leggist á þær um áramótin. Eins og áður segir ráðleggur FA félagsmönnum að anda rólega og forðast að binda fé í aukabirgðum vegna þessa í umfjöllun um málið á vef félagsins.