*

laugardagur, 25. september 2021
Innlent 7. ágúst 2019 09:10

Innkalla Kia vegna öryggisgalla

Askja hefur tilkynnt Neytendastofu að innkalla þurfi ellefu bifreiðar af gerðinni Kia Optima.

Ritstjórn
Aðsend mynd

Askja hefur tilkynnt Neytendastofu að innkalla þurfi ellefu bifreiðar af gerðinni Kia Optima. Ástæða innköllunarinnar er sú að villa er í hugbúnaði svokallaðrar MCF myndavélar sem valdið getur truflunum í öryggisbúnaði bifreiðanna. Þetta kemur fram í tilkynningu frá Neytendastofu.

Umræddar bifreiðar eru meðal annars búnar sjálfvirkri neyðarhemlun sem byggir meðal annars á upplýsingum úr umræddum myndavélum. Viðgerð á gallanum felst í að uppfæra hugbúnað bílsins en það tekur um klukkustund. Eigendum verður tilkynnt um innköllunina símleiðis.

Í tilkynningu Neytendastofu segir að um sé að ræða bifreiðar framleiddar árin 2019 og 2020.