*

laugardagur, 16. október 2021
Innlent 1. september 2021 15:15

Innkalla Subaru og Tesla bíla

Neytendastofa hefur tilkynnt um innkallanir á 86 Subaru VX bifreiðum og 24 Tesla bílum af týpu Model 3.

Ritstjórn
Kalla þarf inn 24 Tesla Model 3 bifreiðar.
Aðsend mynd

Neytendastofa hefur tilkynnt um innkallanir á samtals 110 bifreiðum hjá bílaumboðunum BL og Tesla motors Iceland.

BL þarf að innkalla 86 Subaru VX bifreiðar af árgerð 2018-2019. Ástæða innköllunarinnar er sögð vera möguleiki á að boltar á festingu fyrir jafnvægisstöng geti losnað.

Þá þarf Tesla motors Iceland að kalla inn 24 Model 3 bifreiðar af árgerð 2018 - 2021. Ástæða innköllunarinnar er að möguleiki er á að herða þurfi bolta í bremsudælum.

Viðkomandi bifreiðareigandum verður tilkynnt um innköllunina bréfleiðis. Neytendastofa hvetur bifreiðaeigendur til að fylgjast vel með hvort að verið sé að innkalla þeirra bifreiðar og hafa samband við umboðið ef þeir eru í vafa.