Jón Ólafur Halldórsson, forstjóri Olís, segir íslenska neytendur ekki hafa farið varhluta af þeirri lækkun sem orðið hefur á heimsmarkaðsverði á olíu, enda hafi bensínverðið lækkað úr um 250 krónum í rúmar 200 krónur frá síðasta sumri.
„Þetta sýnir hvaða áhrif þetta hefur haft á Ísland og við reynum sífellt að láta heimsmarkaðsverð endurspeglast í útsöluverðinu, en hafa ber í huga að innkaupaverðið er aðeins einn hlutinn af útsöluverðinu. Skattar og gjöld ráða hins vegar miklu þar um. Álagning okkar er í krónutölum en ekki í prósentum, þannig að þótt heimsmarkaðsverð á olíu lækki um 50% þá þurfum við ennþá að borga fyrir okkar rekstur með krónum og þessi krónutala lækkar ekki í takt við olíuverðið úti. Því hækkar hlutur álagningarinnar, hlutfallslega, þegar olíuverð lækkar, en krónutalan ekki.“
Hann segir að þá komi einnig inn í reikninginn opinber gjöld, sem hreyfist ekki í takt við olíuverð, nema þó virðisaukaskatturinn. „Þetta skýrir að stærstum hluta af hverju helmingslækkun á olíuverði skilar sér ekki hingað sem helmingslækkun á bensínverði. Svo má heldur ekki gleyma því að olíuverð er í Bandaríkjadölum, en krónan hefur veikst gagnvart dollaranum undanfarið og hefur það unnið gegn verðlækkunum hér.“
Ítarlegt viðtal við Jón Ólaf er í Viðskiptablaðinu. Áskrifendur geta nálgast blaðið hér .
