*

miðvikudagur, 8. apríl 2020
Erlent 19. mars 2020 10:50

Internetið að klárast

Óljóst er hvort fjarskiptakerfi Evrópu þoli álagið af því að heilu þjóðirnar vinni nú að mestu að heiman. Umferð um Facebook hefur aukist til muna.

Ritstjórn

Evrópusambandið hefur kallað eftir því að streymisveitur á borð við Netflix og Youtube takmarki þjónustu sína svo fjarskiptakerfi Evrópuríkja geti sinnt þeim tugum milljóna sem vinna heima þessa dagana.

Fjarskiptakerfi landanna er hönnuð til að halda í við aukna notkun heima við á kvöldin en kunna hugsanlega ekki að þola aukið álag allan daginn þar sem nám, vinna og afþreying fjölskyldna fer nú að stórum hluta fram í gegnum netið.

Fjarskiptafélög hafa þar til nú verið þess fullviss að innviðir þeirra þoli hið aukna álag. Í gær gaf Thierry Breton, einn af þeirra sem stýrir stafrænni stefnumótun hjá framkvæmdastjórn Evrópusambandsins, hins vegar út að streymisveitur og fjarskiptafélög bæru bæði ábyrgð á því að hægt væri að leysa úr stöðunni. Meðal annars er óskað er eftir því að streymisveitur hætti að bjóða upp á háskerpu og haldi sig við lægri upplausn.

Mark Zuckerberg, forstjóri Facebook, lét hafa eftir sér í gær að það væri áskorun að halda í við aukna notkun, sem væri mun meiri en í toppinum sem myndist árlega gamlárskvöld. Til að mynda hefði fjöldi símtala í gegnum WhatsApp og Messenger tvöfaldast.