*

föstudagur, 20. september 2019
Erlent 31. júlí 2019 09:12

iPhone víkur fyrir nýjum mörkuðum

Síðasti ársfjórðungur kom vel út fyrir Apple þrátt fyrir fallandi sölutölur iPhone, þökk sé miklum vexti annarsstaðar.

Ritstjórn
Sala iPhone-síma hefur farið minnkandi, og stóð undir rétt tæpum helmingi tekna fjórðungsins, sem er lægsta hlutfall frá 2012.
epa

Tæknirisinn Apple hagnaðist um 10 milljarða Bandaríkjadala á síðasta ársfjórðungi og tekjur félagsins námu 53,8 milljörðum dala. Aukin velta þjónustu og aukahluta bætti upp fyrir fallandi sölutölur iPhone. Financial Times segir frá.

Afkoman var betri en spáð hafði verið þrátt fyrir 12,8% lækkun hagnaðar milli ára, og afkomuspá félagsins fyrir yfirstandandi fjórðung var uppfærð upp á við. Þykir það benda til þess að tæknirisinn sé vongóður um velgengni nýrra vara sem kynntar verða í næsta mánuði, meðal annars streymisveitu fyrir myndefni, tölvuleikjaþjónustu, og frumraun fyrirtækisins á sviði kreditkorta.

Hlutabréf félagsins hækkuðu um rúm 4% á eftirmarkaði í kjölfar tilkynningarinnar. Ef ekki er tekið tillit til sölutalna iPhone-símans, sem hafa farið fallandi, óx fyrirtækið um 17%, að sögn fjármálastjóra þess.

Sala iPhone-síma stóð undir 26 milljörðum dala af tekjum síðasta fjórðungs, rétt tæpum helming, en það hlutfall hefur ekki verið jafn lágt síðan 2012. Á móti jukust tekjur af veittri þjónustu um 13% og námu 11,5 milljörðum dala, og tekjur af aukahlutum á borð við snjallúr og heyrnatól (e. wearables) jukust um 48% og námu 5,5 milljörðum dala.

Stikkorð: Apple iPhone