Ísfell hf. hefur eignast allt hlutafé netaverkstæðisins Kristbjargar ehf. í Ólafsfirði og tekur við rekstri þess núna um áramótin. Í tilkynningu vegna viðskiptanna segir að starfsmannahald Kristbjargar breytist ekki og starfsemi fyrirtækisins verði áfram með sama sniði en framboð vöru og þjónustu aukist verulega.
Kristbjörg ehf. hóf rekstur 1973 og sinnir netagerð og sölu og viðhaldi veiðarfæra en selur auk þess snjókeðjur fyrir vörubifreiðar í miklum mæli og vinnuvélar. Þá annast starfsmenn Kristbjargar vöruafgreiðslu Samskipa í Ólafsfirði.
Ísfell hf. hóf starfsemi 1992. Fyrirtækið er eitt hið öflugasta hérlendis á sviði sölu og þjónustu með veiðarfæri, björgunarvörur og ýmsar rekstrarvörur sjávarútvegsins. Hátt í hundrað manns starfa á vegum félagins í tíu starfsstöðvum á Íslandi, Nýfundnalandi og Nova Scotia í Kanada. Samstæða Ísfells veltir um 3,3 milljörðum króna á árinu 2013.
