Ísland ekki skuldugasta þjóð í heimi?

Morgunkorn Glitnis segir frá því í morgun að í nýútkomnum Peningamálum Seðlabankans er athyglisverð grein eftir Daníel Svavarsson, hagfræðing hjá bankanum, þar sem leitast er við að endurmeta erlenda stöðu þjóðarbúsins. Endurmatið felst í því að reikna beina fjárfestingu á markaðsvirði frekar en bókfærðu virði, eins og gert er í opinberum tölum Seðlabanka.

„Markaðsvirði óskráðra fyrirtækja er metið með því að margfalda bókfært verð viðkomandi fyrirtækis með meðal V/I hlutfalli skráðra fyrirtækja í viðkomandi atvinnugrein og landi, hvort sem um er að ræða fjárfestingu Íslendinga erlendis eða erlenda fjárfestingu hér á landi. Telur höfundur greinarinnar að þótt óvissa sé talsverð í þessu mati komist það líklega nær því að endurspegla raunverulega erlenda stöðu en opinberu tölurnar gera,“ segir í Morgunkorni Glitnis.

Þá segir greining Glitnis að með þessu endurmati er dregin upp mun hagfelldari mynd að erlendri stöðu þjóðarbúsins en fæst með því að notast við bókfært virði beinnar fjárfestingar.

Til að mynda fer hrein erlend staða í lok 3. ársfjórðungs 2007 frá því að vera neikvæð um 109% af vergri landsframleiðslu (VLF) niður í að vera neikvæð sem nemur 27% af VLF.

„Þetta er geysimikil breyting, og felur í raun í sér að viðskiptahalli, leiðréttur fyrir gengishagnaði af erlendum eignum í jöfnuði þáttatekna, hafi í stórum dráttum verið sjálfbær frá aldamótum ef ekki enn minni. Hér verður þó að hafa í huga að aðferðin sem í endurmatinu felst leiðir til mun meiri sveiflna á erlendri stöðu, og til að mynda er líklegt að staðan hafi versna nokkuð undanfarna mánuði með lækkandi verði fyrirtækja á alþjóðamörkuðum, þótt hún sé trúlega eftir sem áður mun betri en fram kemur í opinberum tölum,“ segir i Morgunkorni. Ekki skuldugasta þjóð í heimi?

„Þessi munur er geysilega mikilvægur, því miðað við leiðréttinguna erum við ekki lengur skuldugasta þjóð í heimi heldur í áþekkri stöðu og lönd á borð við Írland, S-Kóreu og Bretland hvað varðar ytri stöðu þjóðarbúsins,“ segir í Morgunkorni Glitnis.

Þá segir að Seðlabankinn hafi til skoðunar að fara að birta samhliða tölur um erlenda stöðu bæði miðað við bókfært verð og markaðsverð erlendra eigna.

„Þetta hljóta að teljast jákvæð tíðindi enda hafa áhyggjur af íslenska hagkerfinu undanfarið að verulegu leyti beinst að afleiðingum mikils viðskiptahalla og því hversu hratt erlend staða þjóðarbúsins hafi versnað hin síðustu ár,“ segir í Morgunkorni.