*

miðvikudagur, 3. júní 2020
Innlent 7. maí 2020 15:14

Íslandsbanki veitir brúarlán

Skrifað var undir samning þess efnis í dag milli Seðlabanka Íslands og Íslandsbanka. Fyrsti bankinn til að veita slík lán.

Ritstjórn
Birna Einarsdóttir, bankastjóri Íslandsbanka.
Eyþór Árnason

Íslandsbanki hefur tekið ákvörðun um að taka þátt í veitingu brúarlána til fyrirtækja en skrifað var undir samning þess efnis í dag milli Seðlabanka Íslands og Íslandsbanka. Brúarlán eru hluti af aðgerðum stjórnvalda til að koma til móts við fyrirtæki vegna efnahagslegra afleiðinga Covid-19. Íslenska ríkið mun gangast í ábyrgð fyrir allt að 70% af fjárhæð brúarlána en fyrirtæki þurfa að uppfylla ákveðin skilyrði.

Íslandsbanki greinir frá þessu í fréttatilkynningu og segir í henni að nánari upplýsingar verði birtar á vef Íslandsbanka þegar frekari útfærsla liggur fyrir. Bankinn er þar með fyrsti íslenski viðskiptabankinn til að staðfesta þátttöku í veitingu brúarlána.

„Það er gott að samningar séu að nást enda mikilvægt að styðja við fyrirtækin í landinu sem eru í erfiðri stöðu. Nú þegar samningur við Seðlabankann er í höfn förum við á fulla ferð að vinna að útfærslu brúarlánanna svo hægt sé að koma til móts við þau fyrirtæki sem uppfylla viðeigandi skilyrði. Við höfum lengi sagt að við viljum vera hreyfiafl í samfélaginu og það er ekki síst á svona krefjandi tímum sem þess er þörf," segir Birna Einarsdóttir, bankastjóri Íslandsbanka.