Hagnaður verðbréfa- og fjárfestingasjóða Íslandssjóða á fyrstu sex mánuðum ársins var stöðugur á milli ára og nam 8,2 milljörðum króna. Meðalávöxtun sjóða í stýringu hjá Íslandssjóðum var 16% á ársgrunni. Innlendir hlutabréfasjóðir skiluðu hæstu ávöxtuninni eða 24%-35% á tímabilinu, að því er kemur fram í árshlutareikningi félagsins.

Hagnaður af rekstri Íslandssjóða, sem er dótturfélag Íslandsbanka, var 466 milljónir króna á fyrri hluta ársins samanborið við 169 milljónir króna á sama tíma árið áður. Á aðalfundi félagsins sem haldinn var 16. apríl síðastliðinn var samþykkt að greiða út arð til hluthafa að fjárhæð 482 milljónum króna.

Þóknanatekjur Íslandssjóða námu 1.028 milljónir samanborið við 798 milljónir króna á sama tímabili í fyrra og hækkuðu því um 29% milli ára. Rekstrargjöld jukust um 4,5% og námu 657 milljónum króna. Hjá félaginu starfar 21 sérfræðingur í eignastýringu. Heildarlaunakostnaður félagsins fyrstu sex mánuði ársins, sem inniheldur laun til stjórnar og nefnda á vegum félagsins, nam alls 311 milljónum króna.

Eigið fé í lok júní var 1.963 milljónir króna og eiginfjárhlutfall, reiknað samkvæmt lögum um fjármálafyrirtæki, var 50,5%.

Eignir í stýringu Íslandssjóða námu 377 milljörðum króna í lok júní 2021. Alls eru 22 verðbréfa- og fjárfestingarsjóðir í rekstri hjá félaginu og nam hrein eign þeirra 216 milljörðum króna samanborið við 200 milljarða króna í árslok 2020.

Í árshlutareikningnum er komið inn á ágreininginn milli 105 Miðborgar, sem er í stýringu hjá Íslandssjóðum, við ÍAV vegna uppbyggingu lóða á Kirkjusandsreitnum. Félögin stefndu hvort öðru í byrjun sumars vegna málsins og kröfðust hvort um sig hátt í fjóra milljarða króna en málið bíður nú meðferðar hjá dómstólum.

„Stjórnendur Íslandssjóða telja málshöfðun ÍAV á hendur félaginu fráleita og að afar litlar líkur séu á að málhöfðunin muni leiða til greiðsluskyldu af hálfu félagsins.“

Kjartan Smári Höskuldsson, framkvæmdastjóri Íslandssjóða, um uppgjörið:

„Fyrri hluti ársins einkenndist af afar góðri ávöxtun á innlendum hlutabréfamarkaði auk þess sem verðtryggð skuldabréf skiluðu góðri ávöxtun. Lágir vextir á innlánsreikningum hafa hvatt sparifjáreigendur til fjárfestingar í öðrum eignaflokkum og þar hefur góð eignadreifing í gegnum blandaða sjóði skilað einna bestum árangri. Það er ánægjulegt að sjá sparnað landsmanna aukast jafnt og þétt, sem meðal annars kemur fram í mikilli þátttöku við skráningu nýrra félaga á markað síðustu misserin. Áhersla á ábyrgar fjárfestingar er sífellt að aukast og er aðferðafræði ábyrgra fjárfestinga beitt við stýringu allra okkar sjóða og eignasafna.“