Eyðsla Íslendinga erlendis á föstu gengi jókst um tæp 40% á fyrstu níu mánuðum ársins miðað við í fyrra ef marka má vísbendingar um kortanotkun erlendis. Þetta kemur fram í þjóðhagsspá Hagstofu Íslands sem kom út í síðustu viku.
„Það eru tveir kraftar sem þarna eru að sameinast í þessum mikla vexti. Annars vegar er mikill vöxtur í utanlandsferðum Íslendinga,“ segir Jón Bjarki Bentsson, aðalhagfræðingur Íslandsbanka. Utanlandsferðum Íslendinga um Keflavíkurflugvöll fjölgaði um 15,7% á fyrstu 9 mánuðum ársins miðað við í fyrra.
Jón Bjarki bendir á að ferðamenn miði eyðslu sína á ferðalögum oftar en ekki við verð í sinni heimamynt. „Þannig að menn gera betur við sig í útlöndum í sterku gengi. Ferðirnar verða lengri, fólk fer fínna út að borða, eyðir meiru í ýmiskonar upplifun og kaupir meira í erlendum verslunum. Spegilmyndin af því er að við sjáum útlendingana spara meira við sig í Íslandsferðunum,“ segir Jón Bjarki.
Póstverslun dregur úr veltu verslana
„Hinn þátturinn er að inn í þessa tölu kemur erlend netverslun,“ segir hann. Morgunblaðið greindi nýlega frá því að póstsendingum vegna erlendrar netverslunar hefði fjölgað um 60% á þessu ári. „Það er enn þá gífurlegur vöxtur í pakkasendingum erlendis frá og það flokkast með þessari erlendu veltu. Það endurspeglast að sama skapi í því að velta í innlendum sérverslunum, til dæmis fata- og raftækjaverslunum, er að aukast minna en ella fyrir vikið.“
Þá hefur vöruskiptajöfnuður versnað um 70 milljarða króna síðasta árið miðað við tólf mánuðina þar á undan og er neikvæður um 165,7 milljarða króna samkvæmt bráðabirgðatölum Hagstofunnar. „Það er hluti af sömu sögu, við höfum séð einkaneyslutengdan innflutning vera að vaxa allhratt. Þetta er auðvitað eitthvað sem gerist gjarnan þegar raungengið er tiltölulega hátt,“ segir Jón Bjarki.
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .