*

laugardagur, 31. júlí 2021
Innlent 17. janúar 2017 16:16

Íslendingar og Færeyingar semja

Þorgerður Katrín Gunnarsdóttir, sjávarútvegsráðherra Íslands og Høgni Hoydal sjávarútvegsráðherra Færeyja sömdu í gær um fiskveiðiheimildir.

Ritstjórn
Haraldur Guðjónsson

Þorgerður Katrín Gunnarsdóttir sjávarútvegs- og landbúnaðarráðherra og Høgni Hoydal sjávarútvegsráðherra Færeyja sömdu í gær um fiskveiðiheimildir Færeyinga innan íslenskrar lögsögu fyrir næsta ár. Þetta kemur fram í frétt á vef sjávarútvegs- og landbúnaðarráðuneytisins.

Jafnframt var samið um gagnkvæman aðgang að veiðum í lögsögu beggja. „Heimildir Færeyinga verða þær sömu á næsta ári og þær eru í ár eða um 5.600 tonn, en hámark fyrir þorskveiði hækkar úr 1.900 tonnum í 2.400 tonn.

Samið var um, eins og áður, að Færeyingar geti veitt loðnu við Ísland sem nemur 5% af ákvörðuðum heildarafla í loðnu á vertíðinni en þó að hámarki 30.000 tonn. Áfram eru takmarkanir á heimildum Færeyinga til að verka loðnu um borð eða landa í Færeyjum til manneldis. Þó er sú rýmkun að heimildin til manneldisvinnslu eftir 15. febrúar fer ekki undir 4.000 tonn, þótt það magn nemi hærra hlutfalli en 1/3 af loðnukvótanum,“ segir í fréttinni.

Góð fyrirheit um samstarf Íslands og Færeyja

Hins vegar voru engar breytingar gerðar á heimildum Íslands til að veiða 1.300 tonn af makríl og 2.000 tonn af Hjaltlandssíld í færeyskri lögsögu, né á gagnkvæmum aðgangi þjóðanna til að veita kolmunna og norsk-íslenska síld í lögsögu hvors annars.

„Að lokum lýstu báðir ráðherrarnir ánægju sinni með þann góða anda sem ríkti á fundinum sem gefur góð fyrirheit um að samstarf landanna muni aukast á næstu árum báðum til hagsbóta,“ er einnig tekið fram í frétt sjávarútvegsráðuneytisins.