„Orðið „kúl“ (e.cool) á vel við hér og ég á ekki við ÍSland,“ segir blaðamaðurinn Clive Myrie hjá BBC sem í dag skrifar um ferð sína til Íslands í síðustu viku.
Fyrirsögnina á umfjöllun Myrie mætti túlka þannig: Íslenska kúlið gefur von fyrir framtíðina
Marie lýsir heimsókn sinni á veitingastað 101 hótel í Reykjavík. Þangað hafi hann farið ásamt öðru starfsfólki BBC eftir að hafa fjallað um efnahagsörðugleikana hér á landi.
Myrie lýsir því hvernig hvítvínið hefði náð fullkomleika í köldu glasinu, stólarnir verið úr svörtu leðri, veggirnir hvítir og ljósin dimm á meðan þægileg tónlist var spiluð úr Bang and Olufsen hljóðkerfi.
„Það var aðeins fyrir veikingu krónunnar sem við höfðum tækifæri á að snæða á þessum stað,“ segir Myrie.
Myrie segir 101 hótel gefa táknræna mynd af þeirri velferð sem verið hefur á Íslandi undanfarin ár. Þá segir hann landið hins vegar nú vera á barmi gjaldþrots.
Þá greinir Myrie frá því að hann hafi tekið viðtal við Þórð Friðjónsson, forstjóra Kauphallarinnar og Geir H. Haarde, forsætisráðherra.
„Það kom mér verulega á óvart hversu rólegir þeir voru í viðtölunum,“ segir Myrie og bætir því við að báðir hafi þeir slegið á létta strengi.
„Gæti maður sagt það sama um Gordon Brown við svipaðar aðstæður?“ spyr Myrie en bætir því við að báðir hafi þeir tekið ástandið alvarlega.