Í tilefni af fimm ára starfsafmæli Íslensku lögfræðistofunnar var efnt til listsýningar.
Ljósmynd: Eva Björk Ægisdóttir
Deila
Íslenska lögfræðistofan fagnar um þessar mundir fimm ára starfsafmæli sínu. Af því tilefni var boðið til veislu í húsakynnum stofunnar í Turninum í Kópavogi á föstudaginn. Á sama tíma og afmælisfagnaðurinn fór fram var opnuð málverkasýning í húsnæði lögmannsstofunnar.
Á sýningunni er úrval verka eftir marga af helstu meisturum íslenskrar myndlistarsögu. Þar eru meðal annars verk eftir Nínu Tryggvadóttur, Jón Stefánsson og fleiri.
Verkin eru í eigu Skúla Gunnlaugssonar hjartalæknis, sem búsettur er í Bandaríkjunum. Hann hefur safnað málverkum um nokkurra ára bil og lánaði Íslensku lögfræðistofunni verkin. Við opnun sýningarinnar leiddi Skúli gesti stofunnar í sannleikann um nokkur verkanna. Íslenska lögfræðistofan var stofnuð vorið 2008 af þeim Einari Huga Bjarnasyni, Hauki Erni Birgissyni og Jóhanni H. Hafstein. Síðar bættist Eggert P. Ólason í hóp eigenda.