Íslenska ríkið hefur verið sýknað af tæplega 5,3 milljarða króna kröfu þýska fjármálafyrirtækisins Landesbank Baden--Wurttemberg en það fyrirtæki lánaði Glitni banka um fimm milljarða króna í ágúst árið 2008.

Þar sem íslensku bankarnir féllu í upphafi október varð ekkert af endurgreiðslu lánsins. Það var Fjármálaeftirlitið sem tók ákvörðun um að lánið sem var svokallað peningamarkaðslán myndi ekki færast yfir til Nýja Glitnis banka hf.

Þýska fjármálafyrirtækið byggði mál sitt á því að umrætt lán hafi verið innistæða í viðskiptabanka og því beri íslenska ríkinu samkvæmt lögum að endurgreiða lánið og vísaði í yfirlýsingu Geris H. Haarde, fyrrverandi forsætisráðherra, að innistæður í bönkunum yrðu tryggðar.

Héraðsdómur Reykjavíkur hafnaði þó þessum kröfum á þeim grundvelli að fyrirtækið hafi ekki haft uppi greiðslukröfu á hendur íslenska ríkinu fyrr en heilum átta árum eftir efnahagshrunið.