Kaupþing banki er í 142. sæti yfir stærstu banka í heimi samkvæmt árlegri úttekt alþjóðlega fjármálatímaritsins ?The Banker?. Kaupþing er eini íslenski bankinn sem er meðal 200 stærstu banka í heimi en Landsbankinn er í 202 sæti og hefur færst upp um 34 sæti, mikið til vegna innri vaxtar.
Í fyrra var Kaupþing banki í 177. sæti og hefur því hækkað sig um 35 sæti milli ára. Röðun á listann byggist á svo kölluðum eiginfjárþætti 1 (e.tier 1). Meðal banka sem eru neðar á listanum má nefna; DEPFA Bank á Írlandi (152), Bradford & Bingley á Bretlandseyjum (189) og Caixa Catalunya á Spáni (196).
Bank of America Corp. er stærsti banki í heimi núna og hefur farið framúr Citigroup sem er í öðru sæti og HSBC Holdings í því þriðja.
Íslensku bankarnir hafa þotið upp listann á undanförnum árum. Frá 2002 hefur Kaupþing hækkað um 770 sæti, Landsbankinn um 648 sæti og Glitnir um 488 sæti.
