Hlutfallslega minni sala nýbygginga var á höfuðborgarsvæðinu, en á landsbyggðinni, en 11% íbúðaviðskipta á höfuðborgarsvæðinu í febrúar voru vegna nýbygginga, utan höfuðborgarsvæðisins var hlutfallið 24% í janúarmánuði

Vísitala íbúðaverðs á höfuðborgarsvæðinu lækkaði milli mánaða á sama tíma og verð eldri íbúða hækkaði að því er segir í nýrri mánaðarskýrslu Íbúðalánasjóðs. Víða orðið hlutfallslega hagstæðara en áður að leigja fremur en kaupa þriggja herbergja íbúð.

Aukning í sölu nýbygginga á vaxtarsvæðum utan höfuðborgarsvæðisins

Hlutfallslega færri nýbyggingar voru seldar á höfuðborgarsvæðinu í febrúar samanborið við mánuðinn á undan. 11% viðskipta á höfuðborgarsvæðinu í febrúar voru vegna kaupa á nýbyggingum samanborið við 16% viðskipta í janúar.

Nýbyggingar eru alla jafna dýrari en eldri íbúðir og gæti hlutfallslega minni sala þeirra í febrúar skýrt lækkun á vísitölu íbúðaverðs milli mánaða.

Það sem af er ári hafa 120 nýbyggingar verið seldar á höfuðborgarsvæðinu en til samanburðar seldust 276 nýjar íbúðir á fyrstu tveimur mánuðum ársins 2018. Á ákveðnum svæðum utan höfuðborgarsvæðisins er þróunin önnur.

Í febrúar voru 24% íbúðaviðskipta utan höfuðborgarsvæðisins vegna nýbygginga og það sem af er ári hafa 119 nýbyggingar selst þar, í samanburði við 83 fyrir ári síðan. Hlutfallsleg aukning varð mest í Reykjanesbæ og Hveragerði.

Ívið hagstæðara að leigja en kaupa

Langtíma þróun sýnir að víða hefur hagstæðara orðið að leigja þriggja herbergja íbúð. Einfaldur samanburður á þróun kaup- og leiguverðs þriggja herbergja íbúða víðsvegar um land sýnir að almennt séð hefur orðið ívið hagstæðara að leigja en kaupa síðustu ár þar sem húsnæðisverð hefur hækkað hraðar en leiguverð.

Á síðasta ári gaf samspil kaup- og leiguverðs til kynna að það tæki 16 ár fyrir leigugreiðslur að greiða upp kaupverð þriggja herbergja íbúðar á Akranesi og Kópavogi. Styttri tíma tæki það í Reykjanesbæ og austurhluta Reykjavíkur eða um 13 ár.

Ólík staða húsnæðismála eftir sveitarfélögum

Flest sveitarfélög landsins eru annað hvort búin að birta eða komin vel á veg með gerð húsnæðisáætlunar. Áætlanirnar gefa greinargóða mynd af stöðu húsnæðismála í hverju sveitarfélagi fyrir sig af því er segir í fréttatilkynningu frá Íbúðalánasjóði.

Af þeim má m.a. sjá að á höfuðborgarsvæðinu og í stærstu sveitarfélögum landsins er þörf fyrir hentugt húsnæði fyrir tekju- og eignalága og þörf á smærri íbúðum fyrir eldra fólk sem vill minnka við sig.

Í öðrum sveitarfélögum eru áskoranirnar af ýmsum toga og felast meðal annars í misvægi milli byggingarkostnaðar á nýju íbúðarhúsnæði og markaðsverði þess.